Dibongo ya néné ya Matadi : Mbuta Jean-Pierre Bemba kuizaka yangalala mutindu MCTC kena diatisila bisalu yina kena salama n’a Company ya génie civile EIFFAGE  

Vice-Premier Ministre pe ministre ya Transports, voies de communication pe désenclavement mbuta Jean-Pierre Bemba Gombo salaka kilumbu ya tatu le 17 septembre 2025 n’zietolo ya kisalu n’a dibongo ya néné ya Matadi. Mfumu ya bisalu ya Transports n’a insi ya République démocratique kitaka n’a dibongo ya néné ya Matadi to port international ya Matadi, samuna Ku tala mutindu kena kutambudila bisalu ya ntomosono ya Terminal ya ba conteneurs, yina luyalu ya insi ya République Démocratique du Congo katukaka kupesa n’a Company ya MCTC (Matadi Corridor Terminaux à conteneurs), landila banguizani tulamaka diboko n’a bandambu nionso zole.

N’a kukuma nayandi n’a nganda ya ba m’pepo to avion ya Tsimpi, mbuta Jean-Pierre Bemba Gombo kuizaka yambama n’a Mfumu ya kizunga ya Kongo Central mbuta Grâce Nkuanga Masuangi Bilolo ; yina vuandaka kintuadi n’a président ya inzo ya kinzonzi ya Kongo Central, mbuta Papy Mantezolo Diatezua n’a bantubidi ya nkangu yankaka.

N’a ntuala ya PCA ya MCTC, Bodom Matungulu, ba Directeurs généraux ya Office National ya Transport (Onatra) na ya Lignes Maritimes Congolaises (CVM) n’a ba Mfumu ya Nkaka, mbuta Jean-Pierre Bemba Gombo kuizaka zieta n’a bisika nionso Company ya MCTC kena kusadisa bisalu ya ntomosono ya Terminal ya ba conteneurs nadibongo ya néné ya Matadi.

Kubanda n’a PIER 4, 5, 6, 7,8, n’a kulutilaka n’a centrale ya béton, mbuta Jean-Pierre Bemba Gombo kuizaka mona kimona méso mutindu bisalu kena kutambudila. Nikuna ba kuizaka monisa yandi kukanga ya masuwa MSC HAITI II ya yinda ya 180 mètres n’a PIER 4, landila ndombolo ya Company ya MCTC ya 30 mètres samuna kubuedila dibongo ya ba contenaires nandambu ya maza ya nzadi.

Ba Mfumu ya company ya MCTC nalutuadusu ya Président ya conseil d’administration mbuta Bodom Matungulu pe Directeur général Christian Ngoy kuizaka monisa VPM ya Transports mutindu bisalu kena kudiatila pe mutindu fueti kumina dibongo ya ba conteneurs ya Port ya néné ya Matadi, yina fueteke kuma lokola mabongo ya néné ya yinza.

Mbuta Jean-Pierre Bemba Gombo kuizaka yangalala mutindu MCTC kena diatisila bisalu yina kena Salama n’a Company ya génie civile EIFFAGE. kintuadi n’a ba Mfumu ya Onatra, ya CVM pe ya MCTC, VPM ya Transports mbuta Jean-Pierre Bemba Gombo kuizaka solola mutindu bisalu fueteke Salamana nakuzitisaka bisalu ya bandambu nionso zole (ya Onatra pe ya MCTC).

Mbuabuani ya bandambu nionso zole nantuala ya VPM ya transport vuandaka diluaku samuna campany ya MCTC n’a siamisa Nsilulu nayandi ya kupesa mvutu ya kedika n’a ndombolo ya Mfumu ya insi mbuta Félix Antoine Tshisekedi Tshilombo ya kukumisa dibongo ya Matadi lokola mabongo ya Nkaka ya ba insi ya mputu.